Numba 2 Fo Da Corint Peopo 13
Watch Out Wat You Guys Stay Doing
(Da Rules Second Time 19:15)
1 Dis da numba three time I going ova dea fo see you guys. Da Bible say, “If one guy goin poin finga one nodda guy, gotta get one o two odda guys poining finga too fo da same ting, o no mean notting.” 2 Wen I wen stay wit you guys da numba two time, I awready wen tell you guys, an now I telling you one mo time: Wen I come ova dea I not goin let go da guys dat wen do da bad kine stuff befo. Dass fo any odda guys dat stay doing bad kine stuff too, you know. 3 Plus, you guys like me show proof dat Christ stay talking wen I stay talking. Christ no stay jalike he no mo power wen he do tings fo you guys, but he get plenny power.
4 Christ neva have power wen dey wen kill him on top da cross. An us guys neva have power jalike Christ get power. But God wen give Christ da power fo live now, an he wen give us da power fo live too wit Christ an work fo you guys.
5 Look inside yoaself fo find out if fo real kine you guys trus Christ. Check yoaself out real good. You guys neva know dat Jesus Christ stay tight wit you guys, o wat? If he no stay tight wit you guys, den you not his guys. 6 I trus you guys goin check us out real good, an goin see dat we stay fo real fo Christ. 7 Now I stay aks our Fadda dat you guys no goin do notting wrong. Us guys no worry bout wat odda peopo tink, if dey tink we doing okay o not. But we like you guys do wat stay right, no matta we look like we not fo real -- no bodda us. 8 We no can do notting dat stay going agains da true stuff, but we can do ony wat stay fo da true stuff. 9 Wen you guys get power, an us guys no mo power, we feel plenny good inside. Wat we aks God fo do, is fo help you guys come mo an mo betta everytime.
10 Dass why I write dis stuff wen I no stay ova dea wit you guys, so dat wen I come ova dea, I no need talk heavy an give you guys hard time. God wen tell me fo make you guys strong inside, not fo wipe you guys out.
11 Aloha no, bruddas an sistas. Do everyting right. Listen to wat I say. Tink da same way wit each odda. Be good to each odda. God get plenny love an aloha fo you guys. He goin stay wit you guys all da time an help you guys stay good wit each odda.
12 Give each odda one hug an kiss wit love an aloha. 13 All da peopo dat stay spesho fo God ova hea tell you guys “Aloha.” 14 I like da Boss Jesus Christ do plenny good tings fo you guys. I like God show you guys his love an aloha. An I like Godʼs Spesho Spirit come tight wit all you guys.
2 Corinthians 13
1 This is the third time I am coming to you. At the mouth of two witnesses or three shall every word established.2 I have said beforehand, and I do say beforehand, as when I was present the second time, so now, being absent, to them that have sinned heretofore, and to all the rest, that, if I come again, I will not spare;3 seeing that ye seek a proof of Christ that speaketh in me; who to you-ward is not weak, but is powerful in you:4 for he was crucified through weakness, yet he liveth through the power of God. For we also are weak in him, but we shall live with him through the power of God toward you.5 Try your own selves, whether ye are in the faith; prove your own selves. Or know ye not as to your own selves, that Jesus Christ is in you? unless indeed ye be reprobate.6 But I hope that ye shall know that we are not reprobate.7 Now we pray to God that ye do no evil; not that we may appear approved, but that ye may do that which is honorable, though we be as reprobate.8 For we can do nothing against the truth, but for the truth.9 For we rejoice, when we are weak, and ye are strong: this we also pray for, even your perfecting.10 For this cause I write these things while absent, that I may not when present deal sharply, according to the authority which the Lord gave me for building up, and not for casting down.11 Finally, brethren, farewell. Be perfected; be comforted; be of the same mind; live in peace: and the God of love and peace shall be with you.12 Salute one another with a holy kiss.13 All the saints salute you.14 The grace of the Lord Jesus Christ, and the love of God, and the communion of the Holy Spirit, be with you all.